اول مدوناتى يوم عيد ميلادى

بكتب اول مدوناتى فى اول ساعتين من يوم عيد ميلادى الخامس و العشرين طبعا الكل هيقول كل سنه وانت طيب يا ايمن " وانتوا طيبين يا حبيبى " طبعا فرحان جدا لعيد ميلادى الخامس و العشرين والله معرف ليه بس حاسس انوا مختلف يعنى كبرت بقا ولازم اعقل اصلى بعيد عنكوا لاسع وعندى نص ضارب او اكتر من نص ,,, 25 سنه عدوا عليا بسرعه اوى انا فاكر يوم متولد ده كان احلا يوم فى حياتى الكل فرحان وبيزغرطوا واللى يطلع فلوس من جيبوا وينقط و الكلام ده وانا زى الدهول لامؤخذه مش فاهم حاجه وعمال اعيط يعنى كلنا حياتنا بتبتدى بعياط ونكد اولها زى اخرها عشان كده انا بحزن كتير وبزعل اوى بس عارف ومتاكد انها كده ومش هتتغير بس لازم نفرح وندخل الفرحه جوانا زى مانا فرحان دلوقتى عشان 25 سنه فى حياتى وكل سنه وانا طيب,,عيد ميلادى للمره ال 25 يعدى عليا وانا حوليا صحابى واهلى والكل فرحان لفرحى بس من غير الشخص اللى يفرح من قلبوا ويبقى معايا وفى حضنى وفى قلبى وابقا بهديلوا كل حاجه وكل ما املك اعمل ايه بقا حظى كده بس انا حاطط امل كبير اوى فى ربنا فى عيد ملادى اللى جى اكييد هتبقا معايا ,,بس هيا فين ومين وازاى ,, حد يعرف ؟ قول عليا مجنون . قول عليا موهوم ,, ورااك انا والزمن طويل انا مش هسيبك مستحييل ,,
جالى بقا هشام عباس وقالى شيل ايدك من على خدك انا جمبك انا جى اخدك طيب ده وقتوا يا اتش ,, رديت انا عليه وقولتلوا زمان وانا صغير كنت بحلم ابقا كبير
فعلا كان نفسى اكبر وانا صغير ولما كنت بسمع الاغنيه دى بقول يارب نفسى اكبر ولما كبرت تعب القلب وقولت ياريتنى فضلت صغير زى زماان
زمان كنت بخاف من كل حاجه بخاف العب عجل زى قريبى وصحابى وبخاف من الكوره وبخاف من الخناقه وبخاف من البحر وكنت اعيط ولا اشوفوا سبحان الله انقلب حالى وبقيت زمالكاوى واكيد هصعب عليكوا لما تعرفوا انى زمالكاوى ومتعصب وممكن اضرب اى اهلاوى او اشجع اى فريق ضد الاهلى حتى لو كان عدونا اللى اخدت ارضنا ,, طبعا هتكرهونى عادى لان كل صحابى اهلاويه مفيش غير صحبى شريف وده صحبى من 8 سنين حبينا بعض وفضلنا مع بعض عشان نساند بعض ضد اى مشجع اهلاوى بيفهم او مش بيفهم فى الكوره اصلا مع انى اشك فى موضوع بيفهم دى " بس بقا وحبيت السباحه اوى و بقيت بتاع مشاكل وبرخم على خلق الله ,, سبحان مغير الاحوال
يلا حسن الختام بقا وعرفت حاجه من امير صحبى لازم نقتنع بيها
" عندما تولد يا ابن ادم يؤذن فى اذنك من غير صلاة وعندما تموت يصلى عليك من غير اذان وكأن حياتك فى الدنيا ليست سوى الوقت الذى تقضيه "